Қисқача тавсифи

Шайх Муҳаммад Содиқ Муҳаммад Юсуф ҳазратларининг қаламларига мансуб «Ҳадис ва Ҳаёт» туркумининг «Фароиз ва васиятлар» деб номланган 12-жузи ёзилган аудиодиски. Муҳтарам китобхонлар! «Ҳадис ва Ҳаёт»нинг ўн иккинчи жузи зарур масалаларни ўз ичига олиб, унда турли сабабларга кўра, бизда унутилиб кетган мавзулар ҳақида сўз боради. Мерос масаласи ана ўша мавзулардан бўлиб, у ҳатто кўпгина илм аҳлларига ҳам бегона бўлиб қолган эди. Баъзи бир дарс олиб юрганлар «йўқдан кўра бор» қабилида бир оз ўрганган бўлишмаса, бошқа бировнинг иши ҳам йўқ эди. Аллоҳ таолонинг инояти ила камина бу илмни хорижда қўлдан келганича ўргандим, Ислом маъҳадида дарсга киритиб, бир муддат дарс бериш бахтига ҳам муяссар бўлдим. Шундан сўнг баъзи бир илм толиблари бу илм билан ошно бўлдилар. Халқимиз дийнимизга қайтиш жараёнида бу масалага унча кўп бўлмаса-да, қайта эътибор бера бошладилар. Қадимда фиқҳ китобларида келган фароиз бобларидан ташқари, «Фароизи Сирожия»¬га ўхшаш мерос илми ҳақида алоҳида китоблар ҳам бўлар эди. Аммо ҳозирда бу илм ҳақидаги охирги китоб қайсилигини ҳам билмай қолганмиз. Ана шу нуқтаи назардан қўлингиздаги китоб янгилик, тўғрироғи, қайта тақдим этилаётган эски илм¬нинг ўз тилимиздаги янгича талқини бўлса, ажаб эмас. Албатта, ҳар бир одам ҳам бу илмда зикр қилинган масалаларни бир ўқишда уқиб кетавермайди. Бунинг учун ўзига яраша ҳаракат ва тушунча лозим. Аммо уни ўқиган киши бирон нарса ўрганиши турган гап. Ақалли шу илм ҳақида умумий тушунча олади ва ҳар бир одам билиши зарур ҳисобланган ҳақиқатларни ўрганади. Албатта, бу масалада бир китобни ўқиб чиқиш билан киши ўзини бу илмнинг мутахассиси деб эълон қилиши жоиз эмас. Бошқа исломий илмлар қатори, бу илмни ҳам ўз устозларидан алоҳида ўрганиш ва уларнинг ижозатларини олишгина юқоридаги даъвога асос бўлиши мумкин. Китобимиздаги иккинчи муҳим мавзу васият масаласига тегишлидир. Бу масала ҳам бизда унут бўлиб кетган ҳисобланади. Одамларнинг кўпчилиги васиятнинг маъносини билишади. Аммо унинг ҳақиқатини, шаръий таърифини ва унга қандай амал қилишни билишмайди. Шунинг учун ҳам васиятга оид маълумотларни ҳам оят ва ҳадислар асосида илмий равишда ўрганиб чиқиш ҳар бир мўмин-мусулмон учун ўзига яраша аҳамиятга эгадир. «Ҳадис ва Ҳаёт»нинг ўн иккинчи жузи бизга мазкур маълумотларни илмий равишда ўрганиш имконини беради, иншааллоҳ. Китобдаги учинчи мавзу қул озод қилишга бағишланган. Бу масала аллақачонлар эсдан чиқиб кетган. Қолаверса, дунёда расман қулчиликнинг битирилганига анча вақт ўтди. Қулчилик яна қайта тикланиши мумкин ҳам эмас. Бу ишга энг қаттиқ равишда қарши турадиган дийн ҳам Исломдир. Чунки бизнинг дийнимизда ҳур одамни қул қилиш мутлақо мумкин эмас.  Аммо қулчиликнинг тарихини ўрганиш муҳим. Айниқса, биз, мусулмонлар бу масалани алоҳида эҳтимом билан ўрганишимиз лозим. Чунки инсоният тарихида биринчи бўлиб қулчиликка қарши курашган дийн бизнинг дийнимиздир. Айнан ўша ҳақиқатни англаб етишимиз учун ҳам бу масалани чуқур ўрганишимиз лозим. Хулоса қилиб айтадиган бўлсак, «Ҳадис ва Ҳаёт»нинг бошқа жузлари каби, «Фароиз ва васиятлар китоби» деб номланган бу жузи ҳам сиз, азизларнинг жавобини ахтариб юрган кўп саволларингизга жавоб беради ва талай масалаларда кўмакчи бўлади, деган умиддамиз. Аллоҳ таолодан бу ожизона хизматни Ўз даргоҳида солиҳ амаллар қаторига қўшишини сўраб, дуолар қиламиз. Сиз, азизлардан эса дуоларингизда бизни ҳам унутмаслигингизни илтимос қиламиз.

АУДИОФАЙЛЛАР

#	Файл номи	F	Вақти	Битрейт	Ўлчами
1	Кириш сўзи	mp3	07:12	96 KBit	4.95Mb
2	Фароиз илмини ўрганишга ва одилона тақсимлашга қизиқтириш ҳақида	mp3	31:03	96 KBit	21.33Mb
3	Мерос олиш ҳаққи	mp3	01:15	96 KBit	884.42Kb
4	Меросхорлик даражалари	mp3	03:53	96 KBit	2.67Mb
5	Мероснинг арконлари. Мероснинг шартлари	mp3	03:29	96 KBit	2.39Mb
6	Меросни ман қилувчи нарсалар	mp3	10:15	96 KBit	7.04Mb
7	Меросдан тўсиладиганлар	mp3	07:09	96 KBit	4.92Mb
8	Фарзандларнинг мероси ҳақида	mp3	47:30	96 KBit	32.62Mb
9	Ота-она ва абасанинг мероси	mp3	11:20	96 KBit	7.79Mb
10	Бошқанинг сабабидан асаба бўлиш	mp3	01:06	96 KBit	773.91Kb
11	Бошқа билан бирга асаба бўлиш	mp3	00:48	96 KBit	571.56Kb
12	Сингиллар ва калола мероси ҳақида	mp3	14:02	96 KBit	9.64Mb
13	Ҳажб масаласи	mp3	02:19	96 KBit	1.6Mb
14	Маҳрум қилувчи ҳажбга учрамайдиган меросхўрлар	mp3	00:36	96 KBit	423.71Kb
15	Маҳрум қилувчи ҳажбга учрайдиган эркак меросхўрлар	mp3	02:33	96 KBit	1.76Mb
16	Маҳрум қилувчи ҳажбга учрайдиган аёл меросхўрлар	mp3	01:29	96 KBit	1.02Mb
17	Муборак биродар масаласи	mp3	01:23	96 KBit	981.15Kb
18	Машъум биродар масаласи	mp3	01:03	96 KBit	743.6Kb
19	Муштарак масала	mp3	03:01	96 KBit	2.08Mb
20	Эр ва ҳотиннинг мероси ҳақида	mp3	08:12	96 KBit	5.63Mb
21	Бобо ва момо мероси ҳақида	mp3	13:04	96 KBit	8.98Mb
22	Вало орқали мерос олиш ҳақида	mp3	11:07	96 KBit	7.64Mb
23	Аёл томонидан бўлган яқинлар мероси	mp3	12:35	96 KBit	8.65Mb
24	Эркак меросхўрлар	mp3	19:42	96 KBit	13.53Mb
25	Аёл меросхўрлар	mp3	21:30	96 KBit	14.77Mb
26	Набий алайҳиссаломнинг молу мулклари умматларигадир	mp3	07:14	96 KBit	4.97Mb
27	Ҳисоб	mp3	11:49	96 KBit	8.13Mb
28	Авл масаласи	mp3	02:14	96 KBit	1.54Mb
29	Авл бўладиган ва бўлмайдиган масалалари	mp3	00:18	96 KBit	210.95Kb
30	Авл бўлмайдиган масалалар	mp3	02:53	96 KBit	1.99Mb
31	Авл бўладиган масалалар	mp3	07:31	96 KBit	5.16Mb
32	Минбария масаласи	mp3	01:09	96 KBit	813.71Kb
33	Радд	mp3	01:30	96 KBit	1.04Mb
34	Радднинг қоидалари	mp3	10:59	96 KBit	7.54Mb
35	Васият ҳақида	mp3	06:32	96 KBit	4.49Mb
36	Васият учдан биргадир	mp3	11:14	96 KBit	7.72Mb
37	Ворисга васият қилиш йўқ	mp3	06:57	96 KBit	4.77Mb
38	Васий етимнинг молидан маъруф ила ейди	mp3	10:15	96 KBit	7.05Mb
39	Балоғатдан сўнг етимлик йўқ	mp3	07:52	96 KBit	5.41Mb
40	Қул озод қилиш ҳақида	mp3	37:24	96 KBit	25.68Mb
41	Қариндош моликлик ила озод бўлади	mp3	04:16	96 KBit	2.94Mb
42	Мукотаба	mp3	10:44	96 KBit	7.38Mb
43	Хотима	mp3	15:18	96 KBit	10.51Mb
44	Хулоса. Ҳуррият ҳаққи	mp3	13:46	96 KBit	9.46Mb
45	Ислом ва қулчилик	mp3	10:10	96 KBit	6.99Mb