Қисқача тавсифи

Шайх Муҳаммад Содиқ Муҳаммад Юсуф ҳазратларининг қаламларига мансуб «Зикр аҳлидан сўранг» китобининг 3-қисми электрон нашри.Валий ва Ҳамийд Зотга беҳад, беадад шукурлар бўлсинки, бугунги кунда «Зикр аҳлидан сўранг» ойномасининг 100-сони ҳам китобхонлар қўлига етиб борди. Шу вақтгача бир ярим мингга яқин турли саволларга имкон қадар жавоб бериб келдик. Аммо китобчамизнинг ҳажми чекланган бўлганлиги сабабли, ҳамма саволларга ҳам батафсил жавоб беришнинг имкони бўлмай, кўпгина саволларнинг жавоби қисқароқ бўлиб қолганлиги ҳам сир эмас. Ушбу савол-жавоблар каттароқ китобда жамланишини сўраган китобхонларимизнинг талаб ва истакларни ҳисобга олган ҳолда «Зикр аҳлидан сўранг» ойномамизни йирикроқ тўплам сифатида қайта нашр этишга киришдик. Бунда, албатта, аввалги китобчаларимиздан фарқли бир қанча жиҳатлар бўлишини ҳам мулоҳаза қилдик. Масалан, аввалги китобчалар ён чўнтакда олиб юришга мўлжалланганлиги сабабли, оят ва ҳадисларнинг арабий матнини илова қилмаган эдик. Эндиги тўпламимизда эса оят ва ҳадисларнинг матнини тўлиқ келтириб, уларнинг шарҳига ҳам етарлича ўрин ажратилди. Аввалги китобчалар долзарб саволларга тезкор жавоблар тарзида бўлганлиги учун, уларни маълум бобларга саралашнинг имкони йўқ эди. Мазкур тўпламда эса саволларни фиқҳий масалалар бўйича турли бобларга ажратиб, умумлаштириб бердик. Албатта, бунда бир масала бўйича саволларнинг такрорланиб келишининг олдини олиш ҳам мумкин бўлди. Қолаверса, китобхонларнинг ўзларини қизиқтирган мавзуларни топишлари ҳам осонлашди. Китобхонлардан келган саволларни иложи борича таҳрир қилмасдан ҳавола этиш фикримиз аввалги китобчаларимизда умумий ҳолатни англаб олишимизга ёрдам берган эди. Маълум бўлишича, кўпгина китобхонларимизнинг диний, дунёвий ва ҳаттоки имловий саводлари ҳам ҳавас қиларли даражада эмас экан. Баъзан савол матнидан аниқ бир маънони англаб олиш қийин бўлган ҳолатлар ҳам учраб қоларди. Бошловчи намозхон ҳам билиши шарт бўлган жўнгина саволларни қайта-қайта сўрайвериш оддий ҳолга айланиб қолди. Баъзан эса, ғаразли мақсадларда берилган саволлар ҳам келиб турарди. Ушбу савол-жавобларнинг иложи борича давомий, барча учун хайрли ва фойдали ҳамда холис бўлишини кўзлаб, эндиги тўпламимизда саволларимизни маъно ва имло нуқтаи назаридан иложи борича яхшилаб таҳрир этишга ҳаракат қилдик. Бунда ушбу саволлар орқали ҳам китобхонларимизнинг умумий саводларини оширишни, хусусан, савол бериш одобини ўргатишни бош мақсад қилиб белгиладик. Турли сабабларга кўра аввалги китобчаларимизда қисқароқ жавоб берилган саволларга мазкур тўпламда кенгроқ, иложи борича батафсил жавоб беришга ҳаракат қилдик. Айни пайтда, маълум бир мавзудаги такрорий саволларни умумлаштириб, ўша мавзуга оид асосий далил-ҳужжатларни келтирган ҳолда, атрофлича жавоб беришни маъқул кўрдик. Ушбу мавзу бўйича берилиши мумкин бўлган яна бошқа саволларни ҳисобга олиб, баъзи жавобларга анчагина кенг ўрин ажратдик. Китобхонлар орасида турли тушунмовчиликлар ва ихтилофлар чиқмаслиги учун яна бир бор таъкидлаб айтамизки, ушбу тўпламдаги саволларга биз ўз фикримиздан келиб чиқиб эмас, балки шаръий масдарларга суянган ҳолда жавоб бериб, аниқ бир масала юзасидан шариатнинг ҳукмини илмимиз етган даражада баён этдик. Шу маънода аввалги китобчаларимиздаги баъзи савол-жавобларни қисқартириб, баъзиларини тўлатишга ва яна баъзиларига бир оз аниқлик киритишга ҳам тўғри келди. Шунинг учун, ушбу тўплам асосий манба деб қаралиши лозимлигини алоҳида таъкидлаймиз.

Китобнинг мундарижаси

• Қуръон ва суннат
• 1-боб. Қуръон ҳамда уни тафсир ва таржима қилиш ҳақида
• Тиловат саждаси
• 2-боб. Суннати набавийа ҳақида
• Рашк марғубдир
• Ақоид
• 3-боб. Ислом ва иймон ҳақида
• Иймон билан ислом, мўмин билан 
• мусулмон орасидаги фарқ
• 4-боб. Илоҳиёт ҳақида
• 5-боб. Нубувват ҳақида
• 6-боб. Кавниёт ҳақида
• 7-боб. Ғайб олами ҳақида
• 8-боб. Бошқа ақийдавий масалалар
• Ўлганларга дуо қилиш ва уларга савоб аташ 
• Садақанинг савоби етишига далил
• Рўзанинг савоби етишига далил 
• Ҳажнинг савоби етишига далил 
• Савобни бағишлаш ҳақида
• бидъат аҳлининг мазҳаби 
• Бидъат аҳлининг далиллари 
• Бидъат аҳлининг далилларига жавоб 
• Шайх масаласи
• Ибодат китоби
• 9-боб. Таҳорат ва поклик ҳақида
• Ғуслнинг фарзи
• Ғуслнинг суннатлари
• Ғуслни вожиб қилувчи нарсалар
• Суннат ғусллар
• 10-боб. Намоз ҳақида
• 11-боб. Жамоат намози ҳақида
• Намозда қалб ҳозир бўлиши омиллари
• 12-боб. Жума намози
• Жуманинг фарзлиги ҳақида
• 13-боб. Нафл намози
• 14-боб. Масжидлар хусусида
• 15-боб. Жаноза ва маййит ҳақида
• 16-боб. Қабристон ва мақбаралар ҳақида
• 17-боб. Закот ҳақида
• 18-боб. Садақа ҳақида
• 19-боб. Зикр ва дуо хусусида
• Зикрнинг фойда ва самаралари
• Зокирнинг одоблари
• Муомалот
• 20-боб. Олди-сотди ҳақида
• 21-боб. Ширкатлар ҳақида
• Музораба ширкати
• 22-боб. Иш ва ишчилар ҳақида
• Меҳнат ҳуррияти
• 23-боб. Мулк ва эгалик ҳақида
• Оила ва турмуш
• 24-боб. Совчилик ҳақида
• 25-боб. Маҳр ҳақида
• 26-боб. Никоҳ ҳақида
• Нодуруст никоҳлар 
• 27-боб. Нафақа ҳақида
• 28-боб. Энагалик ҳақида
• 29-боб. Янги туғилган гўдакка оид ҳукмлар 
• Ақийқа ва янги туғилган болага қилинадиган нарсалар ҳақида
• 30-боб. Талоқ ҳақида
• 31-боб. Насаб ва фарзанд боқиб олиш ҳақида
• 32-боб. Етимлар ҳақида
• Тақиқ ва рухсатлар
• 33-боб. Таомлар ва ичимликлар
• 34-боб. Соф табиат хислатлари ҳақида
• 35-боб. Либослар ҳақида
• 36-боб. Маъсият ва жиноятлар ҳақида
• 37-боб. Алдов ва қалбакилик ҳақида
• 38-боб. Ҳайвонга меҳр ҳақида
• 39-боб. Расм ва тасвир ҳақида
• 40-боб. Аёлларга оид ҳукмлар ҳақида
• 41-боб. Адабиёт 
• Убайдуллоҳ ибн Масъуд
• «Мухтасари виқоя»
• Шаръий сиёсат китоби
• 42-боб. Фатво ва қозилик ҳақида
• 43-боб. Туш таъбири ҳақида
• Тиб китоби
• 44-боб. Даволаш ва даволаниш ҳақида
• 45-боб. Пластик жарроҳлик ҳақида
• Ахлоқ ва одоб
• 46-боб. Яхшилик ва силаи раҳм ҳақида
• 47-боб. Салом бериш ҳақида
• Руҳий тарбия
• 48-боб. Тасаввуф ҳақида
• 49-боб. Таваккул ҳақида
• 50-боб. Тавба ҳақида
• 51-боб. Хавф ва ражо ҳақида
• 52-боб. Тил офатлари ҳақида
• Ёлғоннинг сабаблари
• Ёлғоннинг турлари
• Ёлғоннинг ҳукми
• 53-боб. Қалб касалликларини даволаш ҳақида
• Турли мавзулардаги саволлар
• Китоб маълумотлари